-Ֆուրմա’ն, հավանաբար, չէիր սպասում, որ հայկական սպորտային կայք կապ կհաստատի քեզ հետ:

-Այո, չէի սպասում: Ինձ համար, անկեղծ ասած, սա անակնկալ էր:

-Մեր ընթերցողների համար մի փոքր կպատմե՞ս, թե որքան ժամանակ է' Իսպանիայում ես ապրում:

- Ծնվել եմ Գյումրիում, իսկ Հայաստանից տեղափոխվել ենք Իսպանիա 2002 թվականին: Հայրս նախքան այդ 2 տարի ապրել է Իսպանիայում, իսկ հետո ընտանիքով տեղափոխվեցինք:

-Ինչպե՞ս քեզ մոտ առաջացավ սեր դեպի ֆուբոլը:

-Ֆուտբոլով սկսեցի հետաքրքրվել, երբ «Սևիլիայի» մարզադաշտում դիտեցի «Բարսելոնայի» դեմ հանդիպումը: Այդ օրվանից ինձ մոտ մարզաձևի նկատմամբ մեծ սեր առաջացավ:

-Իսկ ինչու՞ ընտրեցիր հենց «Սևիլիայի» մարզադպրոցը:

-Ընկերոջս միջոցով 10 տարեկանում մասնակցեցի «Սևիլիայի» փորձնական խաղերին, լավ տպավորություն թողեցի այդ ժամանակ և ինձ ընդունեցին ակումբի ակադեմիա:

-Եզրային պաշտպանի դիրքում ես հանդես գալիս: Ի սկզբանե է այդպես եղե՞լ, թե՞ այլ փորձարկումներ ևս եղել են:

-Խաղացել եմ և' կիսապաշտպանությունում, և' հարձակման գծում, սակայն վերջնական դիրքս եզրային պաշտպանինն է:

- Ֆուրմա’ն, Հայաստանի մինչև 17 տարեկանների հավաքականից մի քանի անգամ հրավերներ ստացել ես: Կպատմե՞ս ապրումներիդ մասին:

-4 անգամ հրավեր եմ ստացել: Դրանցից երկուսը հավաքներ են եղել, իսկ մյուս երկուսը պաշտոնական հանդիպումներ Ղազախստանի և Սերբիայի դեմ: Բոլոր դեպքերում էլ շատ լավ տպավորություններ եմ ստացել և հիանալի զգացողություններ եմ ունեցել:

-Երբ խաղում էիր Հայաստանի Մ-17 հավաքականում, Հայաստանի ֆուտբոլիստների և քո խաղային մոտեցումների մեջ ինչ-որ տարբերություններ նկատեցի՞ր:

-Ահա, տարբերություններ կային: Մենք տարբեր ձև էինք գործում. Հայաստանում անհատական ֆուտբոլ ավելի շատ էին խաղում:

-Եթե հետագայում հրավեր ստանաս և' Հայաստանի ազգային հավաքականից, և' Իսպանիայի գերհզոր ընտրանուց, ո՞րը կընտրես:

-Իհարկե Հայաստանի ազգային հավաքականը: Ես հայ եմ:

-Հայաստանից հեռու ես ապրում, բայց հայկական ֆուտբոլին, հավանաբար, հետևում ես: Հայ ֆուտբոլիստներին ծանո՞թ ես:

-Իհարկե, Հայաստանի ֆուտբոլով շատ եմ հետաքրքրվում, սակայն հայ ֆուտբոլիստներին անձամբ ծանոթ չեմ:

-Հենրիխ Մխիթարյան, Յուրա Մովսիսյան…անունները քեզ հայտնի են, չէ՞: Հավաքականի ելույթներին կանոնավո՞ր ես հետևում:

-Իհարկե, հետևում եմ հավաքականի բոլոր հանդիպումներին: Միայն թե Հայաստանի ակումբային ֆուտբոլից շատ տեղեկացված չեմ:

-Ի՞նչ կասես Դանիայի հետ վերջին հանդիպման մասին:

-Իմ կարծիքով, այդ խաղն ապացույց էր, որ ցանկություն դեպքում մեր թիմը կարող է շատ լավ խաղալ:

-Իսկ Իսպանիայում հայ ֆուտբոլիստների գիտե՞ս:

-Ցավոք, ոչ:

-Խաղադաշտում քո ուժեղ կողմերը որո՞նք են:

-Արագությունս, հարվածիս ուժգնությունը և արագ կողմնորոշվելս:

-Այլ ակումբներում կարիերադ շարունակելու ուղղությամբ մտածե՞լ ես:

-Ես գերադասում եմ շարունակել կարիերաս «Սևիլիայում», այդ իսկ պատճառով այդ ուղղությամբ դեռևս չեմ մտածում:

-Ֆուրման, «Սևիլիայում» մարզիչներդ գո՞հ են քո կատարած աշխատանքից:

-Եթե գոհ չլինեին, մինչև հիմա «Սևիլիայում» հաստատ չէի խաղա:

-«Սևիլիայի» առաջին թիմի ֆուտբոլիստների հետ ծանո՞թ ես: Նրանց հետ երբևէ մարզվե՞լ ես:

-Որոշ խաղացողների հետ ծանոթ եմ, սակայն առաջին թիմում հաստատվելու համար դեռ երկար ճանապարհ պետք է անցնեմ:

-Լա լիգայի խաղերին հաստատապես հետևում ես: Ի՞նչ կանխատեսումներ ունես առաջիկա մրցաշրջանի վերաբերյալ: «Սևիլիան» կկարողանա՞ պայքարել լավագույն քառյակում տեղ զբաղեցնելու համար:

-Իսպանիայի առաջնությունն իրականում շատ անհետաքրքիր է դարձել: Այստեղ ակումբները ֆինանսական շատ մեծ անհավասարությունների մեջ են…Կարծում եմ, որ «Սևիլիան» առաջիկա մրցաշրջանում առաջին վեցյակում տեղ կզբաղեցնի:

-Ւսկ ի՞նչ ես կարծում, առաջատար ֆուտբոլիստներից Խեսուս Նավասի և Ալվարո Նեգրեդոյի հեռանալը շատ կազդի՞ թիմի խաղի վրա:

-Ըստ իս, ավելի շատ զգացվելու է Նավասի բացակայությունը:

-Ֆուտբոլում քեզ համար ամենամեծ նպատակը ո՞րն է:

-Նպատակս Հայաստանի ազգային հավաքականում խաղալն է, ինչպես նաև առաջին լիգայում հանդես գալը:

-Ո՞ր ֆուտբոլիստի հետ կցանկանայիր խաղալ մեկ թիմում և ովքեր՞ են քեզ ոգեշնչում:

-Երկու դեպքում էլ Չավի…

-Հայաստանը կարոտու՞մ ես: Վերադառնալու ցանկություն ունե՞ս:

-Կարոտում եմ….իսկ դուք չէի՞ք ցանկանա Հայաստանից դուրս ապրել....

 Զրուցեց Գայանե Աբասյանը